ROSALÍA DE CASTRO

 O DÍA DE ROSALÍA DE CASTRO
23F

No noso cole celebramos con moita ilusión o Día de Rosalía, unha xornada moi especial arredor da figura de Rosalía de Castro, unha das voces máis importantes da nosa literatura e da nosa identidade.

Ao longo da semana realizamos diferentes actividades para achegarnos á súa vida e á súa obra dun xeito creativo e participativo:

🎨 Retratos de Rosalía

O alumnado pintou e debuxou retratos da autora, cada un cun estilo propio. Rosalía apareceu con cores vivas, con fondo de flores, acompañada de libros… Unha galería chea de arte e admiración.

📝 Palabras que nos lembran a Rosalía

Escribimos palabras relacionadas coa escritora: liberdade, lingua, morriña,Galicia, poesía… Un mural colectivo que resume todo o que representa para nós.

📚 Tarxetas informativas

Elaboramos tarxetas con datos sobre a súa vida e a súa obra: onde naceu, que escribiu, por que é tan importante… Pequenos anacos de información para coñecer mellor a súa traxectoria.

💬 Cómics e caligramas

O alumnado creou cómics inspirados na súa vida e tamén fermosos caligramas a partir dos seus versos, xogando coa forma das palabras para converter a poesía en imaxe.

🎙️ Recitado de poemas

E, como non podía ser doutro xeito, puxemos voz aos seus versos. O recitado de poemas encheu a biblioteca de emoción e sensibilidade, demostrando que a súa palabra segue viva e moi presente.

Con todo este traballo construímos o noso particular Tendal de Rosalía, un espazo cheo de creacións que colgamos con orgullo na nosa biblioteca para compartir coa comunidade educativa. Un tendal de arte, palabras e sentimentos que demostra que Rosalía segue a inspirarnos hoxe, igual que onte.

Porque celebrar a Rosalía é celebrar a nosa lingua, a nosa cultura e a forza da poesía. 🌸📖

CLUB DE LECTURA

 CLUB DE LECTURA

AS SEMENTIÑAS

No segundo trimestre botou a andar na nosa biblioteca unha nova aventura lectora: o Club de Lectura “As Sementiñas”.

E, por que ese nome?

Porque unha semente precisa coidado, tempo e atención para agromar. Hai que plantala nunha boa terra, regala con constancia e darlle luz para que medre forte. Coa lectura pasa o mesmo: o gusto polos libros non nace sempre de maneira espontánea, senón que cómpre acompañalo, compartilo e alimentalo pouco a pouco. Cada historia que lemos é coma unha pinga de auga; cada conversa sobre un libro é un raio de sol. Así, entre todos e todas, imos facendo que esperte e medre o amor pola lectura nos máis novos, ata converterse nunha árbore chea de palabras, imaxinación e soños.

Neste segundo trimestre contamos con tres grupos cheos de ilusión:

• Un grupo de primeiro ciclo.

• Dous grupos mesturados de segundo e terceiro ciclo.

Os máis pequenos están a gozar coa lectura de Conexión Macarrón, da autora Ledicia Costas, unha historia divertida e entrañable que está a dar moito xogo nas nosas xuntanzas.

Por outra banda, os maiores mergulláronse en Plan de rescate, de Antía Yáñez, unha lectura que nos fai reflexionar, comentar e compartir impresións en cada sesión.

“As Sementiñas” xa están plantadas. Agora toca seguir coidándoas entre todos e todas para que medren lectoras e lectores curiosos, críticos e apaixonados polos libros. 🌱📚

TORNEO DE PARCHÍS

I TORNEO DE PARCHÍS

O pasado mes de xaneiro celebramos na biblio un torneo de parchís que tivo moito éxito. Nunha primeira e segunda ronda foron partidas entre alumnado da mesma idade, un deles resultou clasificado para a terceira ronda. Na final participaron un alumno/a de cada ciclo de primaria. Aquí temos unhas imaxes deste torneo tan emocionante!

 

Este Entroido, Biblioxermadiño recoméndache...

ESTE ENTROIDO, BIBLIOXERMADIÑO RECOMÉNDACHE...

Non sabes que ler este Entroido? 

Pois Biblioxermadiño dache unha idea...

 VISITA DE CHELO, UNHA AZAFATA DE VERDADE

No marco do proxecto de centro A volta ao mundo, recibimos a visita dunha azafata que compartiu co alumnado información moi interesante sobre o seu traballo e as súas experiencias viaxando por distintos países. A través desta actividade, o alumnado puido coñecer de primeira man en que consiste esta profesión, os destinos que se poden visitar e a importancia da comunicación e da atención ás persoas.

Desde a biblioteca escolar, como espazo informacional e de aprendizaxe, complementouse esta visita coa consulta de libros e materiais que axudaron a ampliar coñecementos sobre o mundo e as distintas culturas.

 A MAXIA DO NADAL

Durante o Nadal levamos a cabo a actividade A maxia do Nadal, unha proposta chea de ilusión e sorpresa vinculada á nosa biblioteca escolar. Cada neno e nena tiña asignado un amigo invisible, ao que debía deixar unha felicitación navideña ou un debuxo feito con moito agarimo, que se intercambiaron arredor dos libros e dos espazos de lectura. Deste xeito, fomentamos valores como a amizade, a empatía e o gusto pola lectura, facendo destas datas un momento aínda máis especial no noso centro.

  

LECTURA COAS FAMILIAS 

As familias continúan a participar activamente na vida do noso centro, visitando as aulas para compartir momentos de lectura cos seus fillos e fillas. Nesta ocasión, unha familia achegouse á biblioteca para ler o conto “Ratón Tom viaxa a Italia”, unha historia chea de aventuras que espertou a curiosidade e a imaxinación do alumnado. Esta actividade enmárcase no proxecto do centro deste ano, reforzando o gusto pola lectura e fomentando a colaboración entre a escola e as familias.