DÍA DO LIBRO_CONTACONTOS

 Celebración do Día do Libro na Biblioteca

Con motivo do Día do Libro, e coa colaboración do Concello, gozamos dun contacontos moi especial no que o alumnado participou activamente, formando parte das historias e converténdose en protagonista da representación.

A través desta actividade púxose en valor a tradición oral e os contos de antaño, esas historias que os avós e avoas transmitían aos seus netos e netas, mantendo vivo un importante patrimonio cultural. Foi unha xornada chea de imaxinación, participación e aprendizaxe, na que os contos volveron unir xeracións arredor da palabra e da fantasía.

VISITA DUNHA BRIGADA FORESTAL

Unha brigada forestal achegouse para compartir connosco información moi importante sobre a prevención dos incendios forestais.

A través dun divertido conto dos Bolechas, aprendemos como podemos coidar os nosos montes e que medidas debemos tomar para evitar os incendios. Os nenos e nenas participaron con moito interese e descubriron que todos podemos contribuír á protección da natureza.

Ademais, os membros da brigada ensináronnos as ferramentas que empregan no seu traballo diario e explicáronnos para que serve cada unha delas. Foi moi interesante coñecer de preto os recursos cos que contan para previr e combater os incendios.

Para rematar a visita, tivemos a oportunidade de ver de preto un dos vehículos da brigada forestal, o que espertou a curiosidade e a ilusión de todos os participantes.

Queremos agradecer á brigada forestal a súa visita e o seu labor de concienciación, axudándonos a comprender a importancia de coidar e protexer o noso medio natural.

DO SER E DOS FACERES CHAIREGOS: OS TORNEIROS

O noso centro participou nunha exposición de traballos organizada pola Microrrede de Bibliotecas Escolares da Terra Chá, que leva por título DO SER E DOS FACERES CHAIREGOS. O noso centro aportou un panel informativo acerca dos/das torneiros/as, un oficio significativo na nosa vila. Así quedou o noso traballo que se pode visitar ata o 5 de xuño no museo do Castro de Viladonga.

NOVIDADES EN BIBLIOXERMADIÑO!

 

DÍA DA FAMILIA E DAS LETRAS GALEGAS!

Non hai mellor maneira de celebrar o Día da Familia e as Letras Galegas que facéndoo xuntos, entre contos, música e tradición.

Agardámosvos para compartir unha xornada moi especial na que varias familias virán contar contos aos nenos e nenas, enchendo o día de historias, imaxinación e agarimo. Ademais, gozaremos dunha merendola compartida entre todos nós, creando momentos para convivir, celebrar e fortalecer a nosa comunidade.

E como non podía ser doutro xeito, a celebración estará acompañada das nosas cancións populares galegas, para cantar, sentir e vivir a riqueza da nosa cultura.

Un día para gozar en familia, celebrar as nosas letras e manter vivas as tradicións galegas.

 

VISÍTANOS PAULA CARBALLEIRA!

   

A biblioteca viviu unha xornada verdadeiramente inesquecible coa visita de Paula Carballeira, unha das grandes referentes da narración oral e da escena cultural galega.

A súa contada foi, simplemente, extraordinaria. Paula conseguiu conquistar a pequenos e maiores cunha proposta chea de sensibilidade, humor, creatividade e talento, combinando teatro e narración oral dun xeito maxistral.

Os nenos e nenas participaron activamente, riron, soñaron, imaxinaron e deixáronse levar por historias que cobraron vida grazas á súa impresionante capacidade interpretativa. Cada palabra, cada xesto e cada emoción converteron a sesión nunha experiencia única.

Paula Carballeira non só contou historias: creou un espazo de encontro coa fantasía, coa literatura e coa emoción compartida, demostrando unha vez máis por que é unha figura imprescindible da cultura.

Dende a biblioteca queremos agradecer fondamente a súa visita e celebrar a enorme sorte de poder gozar dun espectáculo tan especial, que quedará sen dúbida na memoria de todos e todas as asistentes.

Grazas, Paula, por regalarnos unha experiencia tan marabillosa e por facer da palabra un lugar onde sempre paga a pena volver.

XERMADE, CUNCA DOS TORNEIROS

Sabes a verdadeira relación de Xermade cos torneiros? Cres que coñeces todo sobre isto?

Dende a biblioteca queremos seguir recuperando, conservando e compartindo a nosa memoria colectiva, pero sobre todo aprendendo. Por iso tivemos a oportunidade de realizar unha valiosa entrevista a Alfonso Franco, presidente da Asociación Amigos da Madeira, quen se converteu nunha fonte de información directa e imprescindible grazas ao seu profundo coñecemento sobre o mundo dos torneiros e a súa relación co noso municipio.

A través da súa experiencia, Alfonso axudounos a comprender mellor a importancia histórica, económica e social deste oficio en Xermade, ofrecendo unha visión rica sobre unha parte fundamental do noso patrimonio.

Queremos agora compartir este traballo con todas aquelas persoas interesadas en descubrir ou afondar na historia dos torneiros en Xermade, poñendo en valor un legado que forma parte da nosa identidade.

Convidámosvos a achegarvos a esta entrevista e descubrir, da man dun gran coñecedor, as raíces dun oficio que marcou, e segue marcando, xeracións. 

Pincha no seguinte enlace e descubre, da man de Alfonso Franco, a historia, a tradición e o legado do mundo dos torneiros en Xermade.

ENTREVISTA A ALFONSO FRANCO